17.5.2016
ក្រុងឡុងដ៍: តែមួយប៉ាន់តម្លៃ ១ ម៉ឺនដុល្លារពិតជាថ្លៃខ្លាំងណាស់ ប៉ុន្ដែនៅមានអ្នកនិយមរសជាតិទឹកតែទ្រព្យស្ដុកជាច្រើនហ៊ានចំណាយប្រាក់ចង់ភ្លក្សទឹកតែ ដា ហុងប៉ាវ រសជាតិដើម ដែលទំនងជាតែកម្របំផុតក្នុងលោក។ គ្រាន់តែមួយក្រាម វាមានតម្លៃ ១៤០០ ដុល្លារ ដែលថ្លៃខ្ពស់ជាងមាសដល់ទៅ ៣០ ដងឯណោះ។
ហេតុអ្វីបានតែនេះមានតម្លៃថ្លៃខ្លាំងម្ល៉េះ? យោងតាមគ្រូតែចិន សៀងនីង វូ បានឲ្យដឹងថា វាក៏ព្រោះតែជាតែកម្របំផុតនេះឯង។ ដើមតែ ដាហុងប៉ាវ ស្ទើរតែផុតពូជទៅហើយ ដែលនៅសេសសល់ឯភ្នំវូយី ខេត្ដហ្វូជៀន ប្រទេសចិន។
អ្នកផលិតតែជំនាន់មុនមានឱកាសទៅឃើញតែ ដាហុងប៉ាវ រៀងរាល់ឆ្នាំ ដោយពួកគេធ្វើទៅកាន់ភ្នំវូយីនៅនិទាឃរដូវដើម្បីបែបន់ដល់ទេវតាតែ លូយូ សម្រាប់រដូវកាលប្រមូលផល។
ស្លឹកតែដាហុងប៉ាវប្រភពដើមពីភ្នំវូយី ប្រទេសចិនមានតម្លៃមួយក្រាមប្រមាណ ១៤០០ ដុល្លារ។
ប្រភពដើមតែដាហុងប៉ាវ នៅលើភ្នំវូយី ខេត្ដហ្វូជៀន ប្រទេសចិន។
របាយការណ៍ខ្លះលើកឡើងថាស្លឹកតែ ដាហុងប៉ាវ ត្រូវបានខ្ចប់ជាមួយទឹកដោះពពែពេលវារីកធំ ហើយក្រោយពីប្រមូលផល វាត្រូវគេដុតកម្លោច រួចទុកចោល ៨០ ឆ្នាំ។
មានរឿងតំណាលថា ពេលព្រះមាតាស្ដេចមីងធ្លាក់ខ្លួនឈឺ ព្រះអង្គត្រូវបានព្យាបាលដោយសារតែនេះ។
មន្ដ្រីសំខាន់ស្ដេចមីងម្នាក់ ត្រូវបានបញ្ជូនឲ្យដឹកនាំក្រុមបេះស្លឹកតែ។ គាត់បានដោះអាវពណ៌ក្រហមរបស់ខ្លួន រួចចងលើដើមតែ ដែលងាយស្រួលពេលឡើងទៅកាន់មែកខ្ពស់ៗ។ នោះហើយជាអ្វីដែលដើមតែមានឈ្មោះដូច្នោះ ដាហុងប៉ាវ ដែលមានន័យថា «អាវក្រហមធំ»។
ដើមតែប្រភពដើមមានតម្លៃខ្ពស់ ដែលពួកវាត្រូវបានរក្សាទុកក្រោមការឃ្លាំមើលយ៉ាងហ្មត់ចត់គ្រប់ពេលវេលា ហើយស្លឹកពណ៌ខ្មៅរាងបួនជ្រុងមិនងាយស្រួលរកទិញឡើយ។
ទឹកតែដាហុងប៉ាវ នៅភោជនីយដ្ឋានក្រុងឡុងដ៍មានតម្លៃ ២៥០ ដុល្លារ។
អ្នករាយការណ៍ព័ត៌មាន BBC នាង សាត់គ្លីហ្វ ឲ្យដឹងថា៖ «ទោះជាដោយសារអាយុកាលយូរប៉ុនណា ឬចាស់កម្រិតណា តែនេះនៅតែមានតម្លៃខ្ពស់។ តែគុណភាពខ្ពស់គួរសមអាចមានតម្លៃ ១០០ ដុល្លារក្នុងមួយគីឡូក្រាមនៅវូយីសាន។ ប៉ុន្ដែរាល់ស្លឹកតែ ដាហុងប៉ាវ គុណភាពខ្ពស់បំផុត សុទ្ធតែមានប្រភពពីដើមដែលកាត់ចេញដើមមេ ហើយដើមតែទាំងនោះផលិតតែរសជាតិដើមដ៏កម្របំផុត»។ជាអកុសល ស្លឹកតែ ដាហុងប៉ាវ ដែលត្រូវបានធ្វើចរាចរណ៍សព្វថ្ងៃត្រូវគេកាត់ទុកជាច្រើនឆ្នាំហើយ។ យោងតាម BBC ដើមតែអាយុ ៣៥០ ឆ្នាំ ដែលត្រូវបានកាត់ចុងក្រោយនៅឆ្នាំ ២០០៥ បច្ចុប្បន្នលែងសូវមានស្លឹកលូតលាស់ទៀតហើយ។សូមភ្លក្សរសជាតិទឹកតែកម្រ ដាហុងប៉ាវ មុនពេលវារលាយសាបសូន្យ នៅ Royal China Club ក្នុងទីក្រុងឡុងដ៍ តម្លៃ ២៥០ ដុល្លារក្នុងមួយប៉ាន់ ឬ ៤ ពែងតូចៗ៕HR
Labels: Healthy
